2Cor 8 | MED | STEP | Ei kᵾn, akup wamp angmᵾn ye! Tᵾn ndi, Got nga wamp pol ti uⱡ ei, Masaroniya kona ila, Got nga rapa tenda ila wamp anggᵾtᵾm mbila, mormᵾn wamp kᵾⱡ kᵾn, itim ei mel, enim pileing nᵾmp ninmᵾn.

2 Corinthians 8

Kraist Nga Wamp Mbᵾ Ndi, Wamp Ʉngᵾnᵾl Mat Tᵾk Rᵾpᵾndrᵾng

1 Ei kᵾn, akup wamp angmᵾn ye! Tᵾn ndi, Got nga wamp pol ti uⱡ ei, Masaroniya kona ila, Got nga rapa tenda ila wamp anggᵾtᵾm mbila, mormᵾn wamp kᵾⱡ kᵾn, itim ei mel, enim pileing nᵾmp ninmᵾn. 2 Ei kᵾn, mbun mam mat ndi, wamp kᵾⱡ nga mondpa pili uⱡ ei, oⱡa tᵾpa kᵾndrᵾm. Ui ei kᵾn, wamp kᵾⱡ kurpa kat morung. Wote uⱡ ei, wak rokᵾn, numan kai ou ndupa kandᵾk tᵾk kᵾn, wamp elpa mat tᵾpᵾn, rᵾpᵾndmin nᵾk pilik kᵾn, ku moni na mel mbᵾ minal, tᵾk mᵾk rorung. 3 Uⱡ etᵾng ei nga, na pilip pora ndup kᵾn, nᵾmp ekit ndunt. Wamp kᵾⱡ, en enim nga numan ei ndi pilik, ku moni mbᵾ tᵾk mᵾk rorung. Mel mbᵾ, tᵾk mou rorung mbᵾ ngᵾk, wote mel mat ou nduk pendᵾk ngurung. 4 Wamp kᵾⱡ ronduⱡ mundᵾk, tᵾn waldᵾk kᵾn, tᵾn ndi, en enim kapⱡa namina kᵾn, Juriya kona ila, Got nga manga wingti ila wamp kᵾⱡ, tᵾpᵾn rᵾpᵾndmin nᵾtᵾng. 5 Wamp kᵾⱡ ndi, mel orunga etᵾk, nguin nimbun nitmin ei, wote ou nduk ngorung. Uⱡ ei, tun ndi iting nimbun, pili nᵾpᵾtmᵾn mel etᵾng. Wamp kᵾⱡ kuimp tek, en enim Nuim ei nguk, rᵾkrᵾng ndurᵾng, wote tᵾn kᵾn ngurung ku. Uⱡ i etᵾng ei ndi, Got nga numan ei, pep rok etᵾng. 6 Ei kᵾn, tᵾn ndi, Taitas kᵾn ronduⱡ mundpᵾn nitmin ei, enim kᵾn kuimp tepa, kongun itim uⱡ ei, kᵾmp kᵾm etpa, enim tᵾp rapundpa itangga, enim nga wamp numan ngui uⱡ etmin ei etᵾk, kapⱡa indeing. 7 Enim Got kᵾn, mondpa pili uⱡ, ik ni uⱡ, pilpa kundᵾndi uⱡ, tᵾpa rᵾpᵾndi uⱡ, wote wamp numan ngui uⱡ mbᵾ nga pora, tᵾn nuim mormᵾn. Ei nga, enim nga mel mok rui uⱡ etmin uⱡ kai mbᵾ, pilik kelik, iteing ninmin.

8 Na ndi, mi ik ti, enim nᵾmp ngᵾmp pep reing nᵾmp, ni nanᵾnt mon! Wote wamp elpa mat nga tᵾpa rᵾpᵾndi uⱡ etmin ei kᵾn, enim nga etmin ei kᵾn, to rop kandᵾp, enim nga wamp numan ngui uⱡ ei kupa, muna mon? Ei kᵾnimp pilip nit. 9 Ei kᵾn, tᵾn nga Nuim Jisas Kraist nga wamp poⱡ ti uⱡ ei, enim pilik pora ndurmᵾn. Wote, elim wu mel pi, ei morum. Ei nga, enim tᵾpa rapundpa pilpa kᵾn, elim kurpa purum. Elim kurpa purum ei ndi, enim uⱡ kai mbᵾ nga, etpa nuim mundrum.

10 Akup na nga numan pᵾt kᵾⱡ mel, enim nᵾmp ngunt. Unt nga, pana ila nga, enim kongun ei, puⱡ mondᵾk etᵾng ei, akup etᵾk pora ndᵾi! Tᵾp rᵾpᵾndi uⱡ ei, enim kuimp tek etᵾng. Wote, ei mint mon! En enim numan kai pilik etᵾi! 11 Ei kᵾn, kongun ei, akup tᵾkrᵾk etᵾk pora ndᵾi! Enim unt kongun ei nga, tᵾkrᵾk numan ngurung. Uⱡ ei mel ku, akup enim nga to ila tᵾkrᵾk etᵾk pora ndᵾi! 12 Wote nim ndi, mel mat wamp ti, numan ngokᵾn ngun ndam, uⱡ ei, Got ndi, numan ngurum. Got ndi, wamp ei nga mel tepa morum kᵾⱡ pilpa kᵾn, wamp ei nga mel tepa morum kᵾⱡ, numan ila kᵾmp tᵾndᵾtᵾm. Mel mat, tek muⱡi nambᵾrmᵾn mbᵾ, kᵾmp tindi nandᵾtᵾm.

13 Na ndi, enim wamp mbᵾ kundᵾp kᵾn, wamp mat mbun tᵾk muⱡangina, mat numan kai pilik muⱡeing nimp, ni nanᵾnt mon! Enim wamp pora, numan kai mint pilik muⱡeing nimp nᵾnt. 14 Akup ui ila, enim mel mat ou nduk tek moⱡung ndam, wamp mat wei moⱡung mbᵾ, tᵾk rapᵾndᵾk ngᵾi! Wote, enim wei moⱡᵾng ei kᵾn, wamp mbᵾ ndi, enim tᵾk rapᵾndᵾk ngeing. Uⱡ i eng ei ndi, tᵾn pora, kapⱡa kapⱡa mint muⱡmin. 15 Buk Wingti ei ndi, nimba mel,

“Wamp mat mel ou nduk, tek moⱡung mbᵾ, en enim nga to ila ku tek muⱡing. Wote, wamp mat mel etᵾk tek moⱡung mbᵾ, en enim nga to ila ku tek muⱡing ku,” nᵾtᵾm.

Pol Ndi, Wu Taitas Tᵾpa Korin Kona Ila Mundrum.

16 Wote, na Got kᵾn angge nᵾnt uⱡ ei, nambuⱡ emel, Got ndi, Taitas numan kai mat nguⱡnga kᵾn, tᵾn nga numan pᵾtmᵾn ei mel pilpa, enim tᵾpa rapᵾndᵾmba uⱡ ei nga numan ngumba etᵾm. 17 Ei kᵾn, tᵾn nga nᵾtmᵾn ik ei, pep ropa, kongun etmba ei nga numan ngumba etᵾm. Ei nga, elim nga numan ei ndi, enim kᵾn uimp nimba, unt pitim. 18 Wote, kang wu ᵾngᵾn ti kunda, Taitas kᵾn, tᵾpᵾn rᵾp rundamina uinggil. Kang wu ei, rᵾnang ik kai mbᵾ nilinga, Got nga rapa tenda ila wamp mbᵾ ndi, tᵾk ou nduk etmin wu ei kunda, rᵾp rokᵾⱡ uinggil. 19 Wamp mbᵾ ndi, kang wu ei, kᵾmp rok tᵾk kᵾn, tᵾn kᵾn rᵾp ropa andpa, tᵾn tᵾpa rapundpa, wamp mbᵾ ndi, numan ngui, Got kᵾn angge nᵾk ku moni ngurmin mbᵾ, tangga nᵾtᵾng. Tᵾn ndi, Nuim ei nga mbi paka rondpᵾn kongun etpᵾn, wamp mat pilik mbi nduk, teing nimbun, ora ndupᵾn etmᵾn. Uⱡ ei, Got nga kongun ei, numan ngumbun etmᵾn. 20 Ni kᵾn, tᵾn uⱡ etmᵾn uⱡ ei, wamp ti ndi, ik kit mat, nimba ngui ngᵾngangga nimbun, numan ila pilip etmin kem ngui uⱡ ou ei, rᵾp etpᵾn kai mondurmᵾn. 21 Tᵾn ndi numan ronduⱡ pilpᵾn, Got nga kuimp keta ila uⱡ kun kai mbᵾ etpᵾn, wote wamp mbᵾ nga kuimp keta ila, kunda etmᵾn ku. 22 Akup tᵾn nga ᵾngᵾn kang wu ti, wu Taitas kᵾn, wu ti kᵾn, tᵾpᵾn mundamina kunda ping. Tᵾn ndi, kang wu ei, kᵾnmin pilpᵾn kᵾn, kongun mat tᵾpᵾn ngurmᵾn mbᵾ, numan ngumba etᵾm. Kang wu ei ndi, enim kᵾn mondpa pili uⱡ kai etᵾm ei nga, akup enim tᵾpa rapundpa kongun ei, ronduⱡ mondpa etmba. 23 Enim ndi, Taitas pilik pora ndurmin ni ka! Na nga ᵾngᵾn wu ei kᵾn, na kᵾn kongun tenda ila etmbᵾⱡ. Wote wamp mbᵾ, tᵾpᵾⱡ rapundpᵾⱡ etmbᵾⱡ. Wote, ᵾngᵾn wu na, Got nga rapa tenda ila wamp mbᵾ kᵾn, Kraist nga kongun mbᵾ endᵾtᵾmbil. Uⱡ ei elinggila kᵾn, Kraist nga rᵾⱡang ei, wamp mbᵾ kandurmin. 24 Enim wu raldika kᵾⱡ ndi, wamp numan ngui uⱡ ei, tᵾk ora ndangina kandᵾk kᵾn, Got nga rapa tenda ila wamp mbᵾ ndi, enim nga wamp numan ngui uⱡ ei, etangina kandᵾk kᵾn, tᵾn ik ninmᵾn ei, enim kongun kai ei, kupa etmᵾn nᵾk piling.